今晚御宅男冇人約，為大家講下隻承達。原先一睇係港資公司，都少左多少興趣，而且得萬令手貨作公開發售，爆一百倍回撥都係七萬幾手, 所以無論熱爆唔熱爆，可能又好似隻琥珀，起老孖都唔中。但係睇完國際配售同路演反應後，小第又有啲興趣睇下佢啲料。先說明小第睇嘅書圖畫為主，文字甚少，所以在此胡說八道，並不構成投資邀約也。未知是否新股潮正盛，今日東週刊和經濟日報俱專題報導承達。無可否應，做裝修工程的，始終遇上收數難嘅問題。而且承達港澳業務為主，國內業務只佔三趴多一些，中東杜拜的，更是只聞樓梯響，未來的業務是否能保持強橫增長，確是值得關注。而且今次上市，有部份舊股出街，記者問為什麼? 老細語之，太多新股會稀釋現有股東之權益也！確是依書直說. 加上恆指似乎受制於二一三零零，抽此新股確是未能像金隅般狠。但富貴險中求，承達是否全無可取之道呢？
第一，承達為保薦人工銀國際嘅頭炮，相信為了揚名立萬，不難像派傑亞洲嘅琥珀般，成一路奇兵。第二，做生意講人脈, 承達夠哂。半山一號，日出康城，都會馬尺，名門，新萄京等，儼如長實和賭王之御用公司，難怪彤叔同四太都入飛為其背書。仲有好似未來東涌同大圍車廠嘅大盤都係佢做。再者世博香港館張單都攞到，實更見力強勁。雖然中東業務尚是未知數，但觀乎集資額中部份留作發展當地業務之用，決心可見。而最重要的一點乃現今香港澳門甚至內地嘅盤大堂會所裝潢越見華麗，樓價都賣高啲！承達作為業內大哥，必可受惠於此一趨勢。筆者給予其"上市日可見價" 為五元五角。
琥珀好難中，三百五先可中一，所以大家都覺得承達都要過百先中。由於承達在行內之地位有如長實，信和同賭王之御用公司，所以更加吸引小第仔細研究。琥珀集資億幾，呢隻六億。琥珀超額千逾倍，呢隻我估最多一二百。可分派手數應該似秦發，我估三十可中一，一百搏三。但耀才孖展要二十萬股起，眞係少見，難道是琥珀效應，大家都要大棍乎？都係個句: 大家量力而為.
No comments:
Post a Comment